1Cor 9 | KhmKCB | STEP | តើ ខ្ញុំ គ្មាន សេរីភាព ទេ ឬ ? តើ ខ្ញុំមិនមែន ជា សាវក ទេ ឬ ? តើ ខ្ញុំមិនបាន ឃើញ ព្រះ យេស៊ូ ជា ព្រះអម្ចាស់ របស់ យើង ទេ ឬ ? តើ អ្នករាល់គ្នា មិនមែន ជា ស្នា ដៃ របស់ ខ្ញុំ នៅក្នុង ព្រះអម្ចាស់ ទេ ឬ ?

1 Corinthians 9

1 តើខ្ញុំគ្មានសេរីភាពទេឬ? តើខ្ញុំមិនមែនជាសាវកទេឬ? តើខ្ញុំមិនបានឃើញព្រះយេស៊ូជាព្រះអម្ចាស់របស់យើងទេឬ? តើអ្នករាល់គ្នាមិនមែនជាស្នាដៃរបស់ខ្ញុំនៅក្នុងព្រះអម្ចាស់ទេឬ? 2 ទោះបីខ្ញុំមិនមែនជាសាវកសម្រាប់អ្នកដទៃក៏ដោយក៏ខ្ញុំជាសាវកសម្រាប់អ្នករាល់គ្នាដែរព្រោះអ្នករាល់គ្នាជាត្រាសំគាល់តួនាទីជាសាវករបស់ខ្ញុំនៅក្នុងព្រះអម្ចាស់។ 3 ខ្ញុំសូមឆ្លើយការពារទៅកាន់ពួកអ្នកដែលកំពុងចោទប្រកាន់ខ្ញុំដូច្នេះថា 4 តើយើងគ្មានសិទ្ធិស៊ីផឹកទេឬ? 5 តើយើងគ្មានសិទ្ធិនាំប្រពន្ធដែលជាអ្នកជឿទៅជាមួយដូចជាពួកសាវកផ្សេងទៀតឬដូចជាបងប្អូនរបស់ព្រះអម្ចាស់និងដូចជាលោកកេផាសទេឬ? 6 តើខ្ញុំនិងលោកបារណាបាសគ្មានសិទ្ធិឈប់រកស៊ីចិញ្ចឹមជីវិតទេឬ? 7 មិនដែលមានអ្នកណាធ្វើទាហានហើយបើកប្រាក់ខែពីខ្លួនឯងទេក៏មិនដែលមានអ្នកណាដាំទំពាំងបាយជូរនៅចម្ការហើយមិនបានបរិភោគផ្លែវាដែររួចក៏មិនដែលមានអ្នកណាឃ្វាលហ្វូងសត្វហើយមិនបានផឹកទឹកដោះរបស់វាឡើយ។ 8 ខ្ញុំនិយាយសេចក្ដីទាំងនេះមិនមែនតាមបែបមនុស្សទេហើយតើគម្ពីរវិន័យមិនបាននិយាយអំពីសេចក្ដីទាំងនេះដែរទេឬ? 9 ដ្បិតនៅក្នុងគម្ពីររបស់លោកម៉ូសេបានចែងថា៖ «កុំឃ្លុំមាត់គោពេលកំពុងបញ្ជាន់ស្រូវ»។ ព្រះជាម្ចាស់មិនខ្វល់ពីសត្វគោទេ 10 ព្រះអង្គមានបន្ទូលដូច្នេះដោយព្រោះយើងទាំងអស់គ្នាដ្បិតមានសេចក្ដីចែងទុកសម្រាប់យើងថាអ្នកភ្ជួររាស់គួរតែភ្ជួររាស់ដោយសង្ឃឹមរីឯអ្នកបញ្ជាន់ស្រូវគួរតែបញ្ជាន់ដោយសង្ឃឹមថានឹងទទួលបានចំណែក 11 បើយើងសាបព្រោះរបស់ខាងវិញ្ញាណដល់អ្នករាល់គ្នាហើយច្រូតយករបស់ខាងសាច់ឈាមពីអ្នករាល់គ្នាវិញតើហួសហេតុពេកឬ? 12 បើអ្នកដទៃមានសិទ្ធិលើអ្នករាល់គ្នានោះតើយើងមិនកាន់តែមានសិទ្ធិលើសគេទេឬក៏ប៉ុន្ដែយើងមិនបានប្រើសិទ្ធិនោះទេផ្ទុយទៅវិញយើងទ្រាំគ្រប់បែបយ៉ាងដើម្បីកុំឲ្យយើងធ្វើឲ្យមានឧបសគ្គណាមួយដល់ដំណឹងល្អរបស់ព្រះគ្រិស្ដឡើយ។ 13 អ្នករាល់គ្នាមិនដឹងទេឬអីថាពួកអ្នកធ្វើការបម្រើព្រះវិហារគេបរិភោគអាហារពីព្រះវិហាររីឯពួកអ្នករង់ចាំបម្រើកន្លែងថ្វាយតង្វាយគេក៏បានទទួលចំណែកពីកន្លែងថ្វាយតង្វាយដែរ 14 ហើយព្រះអម្ចាស់បានបង្គាប់ដែរថាពួកអ្នកប្រកាសដំណឹងល្អត្រូវរស់នៅដោយសារដំណឹងល្អ។ 15 ប៉ុន្ដែខ្ញុំមិនបានប្រើសិទ្ធិទាំងនេះទេហើយខ្ញុំក៏មិនបានសរសេរសេចក្ដីទាំងនេះដើម្បីឲ្យបានយ៉ាងនោះដល់ខ្ញុំដែរដ្បិតខ្ញុំសុខចិត្ដស្លាប់ប្រសើរជាងឲ្យអ្នកណាម្នាក់បង្ខូចកិត្ដិយសរបស់ខ្ញុំ 16 ថ្វីបើខ្ញុំប្រកាសដំណឹងល្អប៉ុន្ដែខ្ញុំគ្មានអំនួតទេព្រោះជាកាតព្វកិច្ចដល់ខ្ញុំបើខ្ញុំមិនប្រកាសដំណឹងល្អទេនោះខ្ញុំវេទនាហើយ 17 ព្រោះបើខ្ញុំធ្វើការនេះដោយស្ម័គ្រចិត្តនោះខ្ញុំមានរង្វាន់ប៉ុន្ដែបើធ្វើដោយមិនស្ម័គ្រចិត្តវិញនោះនៅតែជាតួនាទីដែលត្រូវបានផ្ទុកផ្ដាក់ដល់ខ្ញុំ 18 ចុះរង្វាន់របស់ខ្ញុំនោះជាអ្វី? គឺឲ្យតែខ្ញុំបានប្រកាសដំណឹងល្អដោយឥតគិតថ្លៃដើម្បីកុំឲ្យខ្ញុំប្រើសិទ្ធិរបស់ខ្ញុំនៅក្នុងដំណឹងល្អ 19 ថ្វីបើខ្ញុំមិនត្រូវបម្រើមនុស្សណាមែនប៉ុន្ដែខ្ញុំបានធ្វើឲ្យខ្លួនឯងត្រលប់ជាបាវបម្រើដល់មនុស្សទាំងអស់ដើម្បីឲ្យខ្ញុំអាចនាំសេចក្ដីសង្គ្រោះដល់មនុស្សកាន់តែច្រើន។ 20 នៅចំពោះជនជាតិយូដាខ្ញុំត្រលប់ដូចជាជនជាតិយូដាដើម្បីឲ្យខ្ញុំអាចនាំសេចក្ដីសង្គ្រោះដល់ជនជាតិយូដារួចនៅចំពោះពួកអ្នកនៅក្រោមគម្ពីរវិន័យខ្ញុំត្រលប់ដូចជាអ្នកនៅក្រោមគម្ពីរវិន័យទោះបីខ្ញុំមិននៅក្រោមគម្ពីរវិន័យក៏ដោយគឺដើម្បីឲ្យខ្ញុំអាចនាំសេចក្ដីសង្គ្រោះដល់ពួកអ្នកនៅក្រោមគម្ពីរវិន័យ 21 នៅចំពោះពួកអ្នកគ្មានក្រឹត្យវិន័យខ្ញុំត្រលប់ដូចជាអ្នកគ្មានក្រឹត្យវិន័យដើម្បីឲ្យខ្ញុំអាចនាំសេចក្ដីសង្គ្រោះដល់ពួកអ្នកគ្មានក្រឹត្យវិន័យ(ខ្ញុំមិនមែនរស់នៅដោយគ្មានក្រឹត្យវិន័យរបស់ព្រះជាម្ចាស់ទេដ្បិតខ្ញុំនៅក្រោមក្រឹត្យវិន័យរបស់ព្រះគ្រិស្ដ) 22 ខ្ញុំបានត្រលប់ជាអ្នកទន់ខ្សោយនៅចំពោះពួកអ្នកទន់ខ្សោយដើម្បីឲ្យខ្ញុំអាចនាំសេចក្ដីសង្គ្រោះដល់ពួកអ្នកទន់ខ្សោយ។ ខ្ញុំបានត្រលប់ជាគ្រប់បែបយ៉ាងនៅចំពោះមនុស្សទាំងអស់ដើម្បីឲ្យខ្ញុំអាចសង្គ្រោះមនុស្សខ្លះបានដោយមធ្យោបាយគ្រប់យ៉ាង 23 ហើយខ្ញុំធ្វើគ្រប់បែបយ៉ាងសម្រាប់ដំណឹងល្អដើម្បីឲ្យខ្ញុំត្រលប់ជាអ្នករួមចំណែកនៅក្នុងដំណឹងល្អ។ 24 អ្នករាល់គ្នាមិនដឹងទេឬថានៅក្នុងទីប្រណាំងអ្នករត់ប្រណាំងគេរត់ទាំងអស់គ្នាមែនប៉ុន្ដែមានតែម្នាក់ប៉ុណ្ណោះដែលទទួលបានរង្វាន់ដូច្នេះចូររត់ដើម្បីឲ្យបានរង្វាន់ចុះ។ 25 កីឡាករគ្រប់គ្នាដែលប្រកួតបានលត់ដំខ្លួនគ្រប់បែបយ៉ាងពួកគេធ្វើដូច្នេះដើម្បីឲ្យទទួលបានមកុដដែលនឹងពុករលួយប៉ុន្ដែយើងវិញគឺដើម្បីឲ្យទទួលបានមកុដដែលមិនពុករលួយឡើយ 26 ដូច្នេះខ្ញុំក៏រត់យ៉ាងដូច្នោះដែរមិនមែនដូចជាគ្មានគោលដៅទេខ្ញុំក៏ខំប្រដាល់យ៉ាងដូច្នោះដែរមិនមែនដូចជាដាល់ខ្យល់ទេ។ 27 ខ្ញុំលត់ដំរូបកាយរបស់ខ្ញុំឲ្យត្រលប់ជាអ្នកបម្រើក្រែងលោពេលខ្ញុំប្រកាសដំណឹងល្អដល់អ្នកដទៃនោះខ្ញុំខ្លួនឯងបែរជាត្រូវបានបដិសេធចោលទៅវិញ។